Bədən tərbiyəsi və idman günü münasibəti ilə Prezident təqaüdcüsü olan gənclər üçün peyntbol - tir yarışması keçirilib.

Axar.az xəbər verir ki, bu gün "5 mart Bədən tərbiyəsi və idman günü"nün 10 illiyi münasibəti ilə Milli Olimpiya Komitəsi, Gənclər və İdman Nazirliyi, Müdafiə Nazirliyinin tədris müəssisələrinin dəstəyi, Azərbaycan Respublikası Prezidenti yanında İdarəçilik Akademiyası, Bakı şəhəri Gənclər və İdman Baş İdarəsi və Azərbaycan Peyntbol Federasiyasının birgə əməkdaşlığı ilə peyntbol-tir yarışı keçirilib.

Yarışın açılış mərasimi zamanı mərhum lider Heydər Əliyevin xatirəsi bir dəqiqəlik sukutla yad edilib, Azərbaycan silahlı qüvvələrinin orkestri tərəfindən ifa edilən dövlət himni səsləndirilib.

Mərasimdə Müdafiə Nazirliyinin polkovniki Nazim Əlibəyov, Azərbaycan Peyntbol Federasiyasının prezidenti, millət vəkili Əli Hüseynli, Gənclər və İdman Nazirliyinin nümayındəsi Aydın Məmmədov, Bakı Şəhər Gənclər və İdman Baş idarəsinin rəis müavini Rəşad Əliyev, Azərbaycan Respublikası Prezidenti yanında Dövlət İdarəçilik Akademiyasının Prezidenet təqaüdçüləri qrupunun rəhbəri Təbriz Raufoğlu çıxış edib.

Həmçinin federasiyanın rəhbərliyi və nümayəndələri Fəxri Xiyabanda ümummilli lider Heydər Əliyevin məzarını və Səhidlər Xiyabanını ziyarət ediblər.