Çempionlar Liqasında yarımfinal mərhələsində "Barselona" "Bavariya"nı darmadağın edib.

Axar.az xəbər verir ki, matçın ilk hissəsi qarşılıqlı hücumlar şəraitində keçsə də, 45 dəqiqə boyunca səssizlik pozulmayıb. 76-cı dəqiqədə isə hətta Noyer də Messinin qarşısını ala bilməyib - 1:0.

Qonaqlar özünə gəlməmiş Messi dublunu rəsmiləşdirərək komandasını bir az da qabağa çıxarıb. Oyuna əlavə olunmuş dəqiqələrdə Neymarın vurduğu qol isə darmadağını rəsmiləşdirib.

Qarşılaşma "Barselona"nın sabiq baş məşqçisi Xosep Qvardiola üçün xüsusi önəm kəsb edirdi. Belə ki, ispaniyalı mütəxəssis sabiq klubu ilə duelə çıxırdı. Kataloniya təmsilçisi 2 il əvvəl aldığı böyük hesablı məğlubiyyətlərin əvəzini çıxmaq iddiasında idi. 2012/13 mövsümündə yarımfinalda qələbə qazanan (4:0, 3:0) "Bavariya" həmin vaxt olduğu kimi yenə yarışın qalibi olmaq arzusundaydı. "Barsa" istəyinə nail oldu.