"Atletik" (Bilbao) klubunun baş məşqçisi Ernesto Valverde Bakı "İnter"i ilə oyun haqda danışıb.

Axar.az Qol.aza istinadla xəbər verir ki, 51 yaşlı mütəxəssis "İnter"lə oyuna ciddi yanaşdıqlarını bildirib: "Oyun çətin keçəcək. Rəqib meydanda sonadək mübarizə aparan futbolçulardan təşkil olunub. Onlarla görüşdə səhv edə bilmərik. "İnter"ə hörmətlə yanaşırıq və onları ciddi rəqib kimi qəbul edirik. İkinci matçımız səfərdə olacaq. Bu oyun üçün Azərbaycana uzun səfər edəcəyik. İstənilən halda arxayınlaşmamalıyıq".

"İnter"in futbolçusu Nizami Hacıyev isə geniş müsahibəsində deyib ki, rəqib çox güclüdür: "Ümumiyyətlə, Avropa Liqasında zəif rəqib yoxdur. Sadəcə, zəif hazırlıq var. Komanda zəif hazırlaşırsa, nəticə də qazana bilmir. Biz əlimizdən gələni edəcəyik. Bizim üçün fərqi yoxdur, istər "Atletik" olsun, istərsə də "Real". Bu, bizim komanda üçün bir təcrübə olacaq. Hər bir futbolçu özünə hörmət etməlidir. Şəxsən mən özümə hörmət edirəm. Hansı bir futbolçuya hörmət edirəmsə, özümə ondan daha çox hörmət edirəm. Bu səbəbdən çıxıb meydanda canımı qoyacam. Əlimdən gələn hər şeyi edəcəm ki, yaxşı nəticə əldə edək".

Qeyd edək ki, iyulun 30-da Bilbaoda keçiriləcək "Atletik" - "İnter" oyunu Bakı vaxtı ilə saat 23:45-də başlayacaq.