"Vacib oyuna çıxırıq. Yaxşı bir komandaya qarşı oynayacağıq. "Seltik" indi daha fərqli oyun nümayiş etdirir. Matçın bizim üçün nə dərəcədə əhəmiyyətli olduğunu bilirik. Rəqib hesabda üstün olsa da, qarşıda 90 dəqiqə var. Çalışacağıq ki, azarkeşlərimizi sevindirək".

Qol.Az-ın məlumatına görə, bu sözləri "Qarabağ"ın baş məşqçisi Qurban Qurbanov Çempionlar Liqasının III təsnifat mərhələsinin "Seltik"lə cavab oyunu üçün təşkil olunmuş mətbuat konfransında deyib.

- Meydançanın ot örtüyü ilə bağlı fikirlərinizi bilmək istərdik?

- Bu haqda çox danışmağa ehtiyac yoxdur. Belə hallar olur. Hər halda ən yaxşısını etməyə çalışcağıq. Ola bilər ki, sürətli, daha baxımlı oyuna mane olsun. Ancaq əlimizə düşən şanslardan maksimum istifadə etməyə çalışacağıq.

- Ot örtüyünə görə taktikada dəyişiklik edəcəksiniz, yoxsa "Qarabağ" öz ənənəvi oyununa sadiq qalacaq?

- Başqa yolumuz yoxdur. Ola bilər ki, hər hansı dəyişiklik olsun. Çalışacağıq ki, ən yaxşısını edək.

- "Qarabağ" ilk qolu vurub şansını gözləməlidir, yoxsa ikinci qolu vurub irəli atılmalıdır?

- Əsas odur ki, ilk qolu vuraq. Ancaq daha vacib olan qol buraxmamaqdır.