Təhlükəsizlik məsələsini qabartmaq yersizdir. Bu məsələni siyasiləşdirmək də olmaz. Onu deyə bilərəm ki, bizim üçün fərqi yoxdur, istər Bakıya Mxitaryan gəlsin, istərsə də Roys.

Axar.az xəbər verir ki, bu sözləri "Qəbələ" klubunun meneceri Səməd Nəsibov deyib.

Klub rəsmisi "Qol.az"a açıqlamasında Dortmund "Borusiya"sının erməni futbolçusu Henrix Mxitaryanın Bakıya gəlməyəcəyinə şərh verib:

"Hər bir oyunumuzda klubun təhlükəsizlik xidmətindən əlavə Daxili Qoşunların əsgərləri və polis əməkdaşları da olur.

Bundan əvvəl də gərginlik gözlənilən oyunlarımız olub. Ancaq heç birində xoşagəlməz hallar baş verməyib. Hansısa futbolçuya təhlükə yaranmasından söhbət gedə bilməz".

S.Nəsibov bununla belə, hesab edir ki, erməni oyunçunun gəlməməsi yaxşı oldu: "Müəyyən ajiotaj yarana bilərdi. Bu baxımdan onun gəlməməyi yaxşı oldu. Ancaq təhlükəsizlik baxımından gəlməyində heç bir problem yoxdur".

Xatırladaq ki, alman klubun icraçı direktoru Xans-Yoaxim Vatske Mxitaryanı sırf onun təhlükəsizliyinə görə Azərbaycana aparmayacaqlarını söyləyib.