Bu ilin 9 ayı ərzində Azərbaycanın rezidentləri dünyanın 144 ölkəsi ilə ticarət əməliyyatları həyata keçirib: 97 ölkəyə məhsul ixrac olunub, 137 ölkədən idxal edilib.

Dövlət Statistika Komitəsinin məlumatına görə, doqquz ay ərzində xarici ticarət dövriyyəsi 32,7 milyard dolları təşkil edib. Bu, 2012-ci ilin eyni dövrü ilə müqayisədə 4,5 faiz çoxdur.

Dövriyyənin 8,1 milyard dolları idxalın, 24,6 milyard dolları ixracın payına düşür.

İxrac məhsulları əsasən xam neft, neft məhsulları, təbii qaz, meyvə-tərəvəz, bitki və heyvan mənşəli piylər və yağlardır; idxalda isə qida məhsulları, qara metallar və onlardan hazırlanan məmulatlar, maşın, mexanizm, elektrik aparatları və avadanlıqları, nəqliyyat vasitələri və onların hissələri üstünlük təşkil edir.

Qeyri-neft məhsullarının ixracı ötən ilin yanvar-sentyabr ayları ilə müqayisədə 13 faiz artaraq 1,3 milyard dollara çatıb. Adambaşına düşən qeyri-neft məhsullarının ixracı isə 14,2 dollar artaraq 135,8 dollara çatıb.