Oktyabrın 8-də Rusiya paytaxtı Moskvada sərgi keçirilib.

Axar.az xəbər verir ki, Moskvada fəaliyyətə başlayan "Qızıl payız - 2014" adlı 16-cı Rusiya aqrosənaye sərgisində kənd təsərrüfatı məhsulları nümayiş etdirilib, eləcə də bu məhsulların satışı təşkil olunub.

Bu sərgi 8-11 oktyabr tarixlərində fəaliyyət göstərəcək . "Qızıl payız - 2014" sərgisində kənd təsərrüfatı məhsullarının istehsalı və emalı sahəsində fəaliyyət göstərən 14 Azərbaycan şirkəti də iştirak edir.

Bu şirkətlər meyvə-tərəvəz məhsulları ilə yanaşı, müxtəlif növ meyvə şirələri, cemlər, mürəbbələr, tomat pastası və s. kimi emal məhsullarını nümayiş etdirir və satışını həyata keçirirlər.

Sərgi Azərbaycan şirkətləri üçün istehsal etdikləri məhsulların tanıdılması, ixracının daha da artırılması, həmçinin yeni bazarlara çıxış imkanlarının genişləndirilməsi baxımından əhəmiyyətlidir.

"Qızıl payız - 2014" adlı 16-cı Rusiya aqrosənaye sərgisində Azərbaycan şirkətlərinin təqdim etdiyi məhsulların çoxçeşidliliyi, yüksək keyfiyyəti, qablaşdırma səviyyəsi rusiyalı istehlakçılar tərəfindən böyük maraqla qarşılanır.