Tramp Səudiyyəyə qarşı sərt addım atsa, neftin qiyməti 100 dolları keçəcək.

Axar.az xəbər verir ki, bu sözləri ABŞ-Səudiyyə gərginliyinin neftin qiymətlərinə təsiri haqda danışan iqtisadçı ekspert Natiq Cəfərli deyib.

“Trampın yumşaq açıqlamalar verməsi həm də onunla bağlıdır ki, noyabrda ABŞ-da seçki var, Respublikaçılar ciddi səs itirə bilərlər. Neft daha çox qalxsa, ABŞ-da benzin daha da bahalaşacaq. Obama prezident olarkən bir qallon benzin (ABŞ-da benzin qallonla satılır, 1 qallon 3,785 litrə bərabərdir) 1 dollar 99 sentə qədər ucuzlaşmışdı, indi qiymət 4 dollara yaxınlaşır. Orta statistik amerikalı üçün benzinin qiyməti çox önəmlidir. Tramp Səudiyyəyə qarşı sərt addım atsa, neftin qiyməti 100 dolları keçəcək, 1 qallon benzin isə 5 dollara qədər bahalaşacaq”, - ekspert qeyd edib.

İqtisadçı alim Vüqar Bayramov isə qeyd edib ki, Trampın Səudiyyə ilə silah satışı sövdələşməsinin ləğv edilməyəcəyinə dair açıqlamasından sonra neft bazarında sakitlik müşahidə edilir:

“BP-nin rəhbəri Bob Dudley isə neftin indiki qiymətini dünya üçün “qeyri-sağlam qiymət” kimi dəyərləndirib. Mövcud qiymətdəki artımlar daha çox siyasi səbəblərlə bağlıdır. İrana qaşı sanksiyalar, eləcə də Venesueladakı böhran qiymətə təsir göstərməkdədir. Siyasi səbəblər, o cümlədən Venesuelada böhran səngiyərsə, neftin qiyməti yenidən hər barrel üçün 60-65 dollaradək enə bilər”.

Qeyd edək ki, ABŞ Senatı Qlobal Maqnitski Aktına əsasən Ağ Evdən Qaşıqçı məsələsinə görə Səudiyyə Ərəbistanına sanksiya tətbiq edilməsini tələb edib.