Dollar son bir ayda kəskin yüksəlişdən sonra ABŞ Mərkəzi Bankının (FED) uçot dərəcəsini yavaş artıracağı barədə sözləri ilə dünyanın önəmli valyutaları qarşısında ucuzlaşır.

Axar.az "Bloomberg" agentliyinə istinadən xəbər verir ki, dolların dəyəri 0,2 faiz geriləyərək 1,198 bala enib.

Dollar yapon yeninə nisbətən 0,4 faiz ucuzlaşaraq 119,61 yen olub. Dollar avro qarşısında da dəyər itirib. Belə ki, 1 avro 1,0770 dollara yüksəlib.

Analitiklər dolların ucuzlaşmasında Çinin emal sənayesinin yenidən inkişafa keçməsinin də böyük payı olduğunu bildirirlər. Məhz Çinin emal sənayesinin inkişafı dünyada dollara olan təlabatı azaldıb.

Xatırladaq ki, ABŞ Mərkəzi Bankı ötən ay bəyanatında uçot dərəcəsini sabit saxlayıb. Rəsmilər faiz artımının pilləli şəkildə tətbiq olunacağını və inflyasiya məlumatlarına uyğun addım atılacağını bildiriblər.