Bu gün dünyada “Qara cümə”dir. “Qara cümə”ni önəmli edən əsas məqam məhz bu tarixdə mağazalarda əksər məhsullara böyük endirimlərin tətbiq edilməsidir. Maraqlıdır, görəsən pandemiya dünyada və ölkəmizdə builki “Qara cümə”yə təsir etdimi?

Məsələ ilə bağlı Axar.az-a açıqlama verən ekspert Natiq Cəfərli bildirib ki, builki “Qara cümə” əvvəlki illərə nəzərən çox passiv keçir.

“Bildiyiniz kimi, “Qara cümə” anlayışı 1932-ci ildə ABŞ-da yaranıb və bir neçə il sonra bütün dünyada məşhurlaşıb. ABŞ-da hər il noyabr ayının dördüncü cümə günü milad alış-verişi mövsümünün başlanğıcı kimi qəbul olunur. Bu günü önəmli edən əsas məqam məhz bu tarixdə mağazalarda əksər məhsullara böyük endirimlərin tədbiq edilməsidir.

Ölkəmizdə bu tendensiya hələ yenidir. Son beş-altı ildir geniş vüsət almağa başlayıb. Öz növbəsində bu gün ölkəmizdə də bir çox mağazalar, pərakəndə şirkətlər öz mallarını normal günlərə nəzərən daha ucuz qiymətə müştərilərə təklif edirlər.

Pandemiya alıcılıq qabiliyyətinin aşağı düşməsinə səbəb olub. Hazırda biz istər dünyada, istərsə də ölkəmizdə ən zəif “Qara cümə”nin şahidi oluruq. Müəyyən mənada onlayn satış bazarında aktivlik müşahidə olunsa da, Azərbaycan kimi birbaşa alış-verişə üstünlük verilən ölkələrdə passivlik müşahidə edilir”, - N.Cəfərli deyib.

Ekspertin sözlərinə görə, pandemiya ilə əlaqədar olaraq alıcılar daha çox təməl ehtiyaclarını almağa üstünlük verirlər:

“Hazırda alıcıların prioritetləri də dəyişib. İnsanlar əllərində olan sərbəst vəsaiti ya qənaət etməyə çalışır, ya da ilkin tələbat mallarına yönləndirməyə çalışır. Bu mənada deyə bilərəm ki, bu il “Qara cümə” zəif keçir”.