Avropanın şərqində silahlanma yarışına girən Qərb-Rusiya mübarizəsi artıq Aralıq dənizinə çatıb.

Axar.az xəbər verir ki, Rusiyanın Əsəd rejiminə dəstək üçün “Admiral Kuznetsov” təyyarədaşıyan gəmisini Şərqi Aralıq dənizindəki Tartus limanına göndərməsi NATO-nu hərəkətə gətirib.

Alyans Kipr sahillərindəki döyüş gəmiləri ilə nəzarəti gücləndirib. Bu döyüş gəmiləri arasında Fransanın “Şarl de Qoll” təyyarədaşıyan gəmisi də var. Qərb mediasında yayılan xəbərlərə görə, hazırda NATO gəmilərinin altında Rusiyanın iki sualtı qayığı növbə çəkir.

Bölgədəki ABŞ döyüş gəmiləri də Moskvanın sualtı qayıqlarını axtarmaqla məşğuldur. Siciliya adasından havaya qalxan ABŞ-ın “Poseydon P-8” döyüş təyyarələri Aralıq dənizi üzərində tez-tez uçuşlar keçirərək bu axtarışlara qoşulub.

Qeyd edək ki, Rusiyanın bölgədəki “Oskar II” sualtı qayığı “Daşıyıcı qatil” adı ilə tanınır. 18 min tonluq bu qayığın şəxsi heyəti 100 nəfərdən ibarətdir.