Bu gün Cənubi Afrika Respublikasında Azərbaycan mətbəxinin ləziz nümunələrinin yer aldığı "Dünya bir boşqabda" ("The World on a Plate") adlı kitabın təqdimat mərasimi keçirilib.

Azərbaycanın CAR-dakı səfirliyindən Axar.az-a daxil olan məlumatda bildirilir ki, kitabda dünya kulinariya nümunələri sırasında səfirliyimizin təşəbbüsü və dəstəyi ilə milli mətbəximizin çeşidləri də oxuculara təqdim olunub. Kitabda balıq ləvəngisi və şəkərburanın bişirilmə qaydası göstərilib.

Təqdimat mərasimində həmçinin Azərbaycanla bağlı quraşdırılmış stenddə ölkəmizin mədəniyyəti, təbiəti, tarixi və turizm imkanlarına dair məlumatlar yerləşdirilib.

Qeyd edək ki, "Dünya bir boşqabda" kitabı CAR-da akkreditə olunmuş diplomatik missiya rəhbərləri və üzvlərinin həyat yoldaşlarından ibarət "International Diplomatic Spouses Association"un təşəbbüsü ilə nəşr edilib.