Tanınmış iş adamı-xeyriyyəçi, şair Gülağa Tənha “reket jurnalist”lərin şantajına məruz qalıb.

Bu barədə Modern.az-a onun özü məlumat verib. O, jurnalist adına ləkə gətirən həmin şəxslərə bəzi məmurlar və hüquq-mühafizə işçilərinin himayədarlıq etdiyini vurğulayıb:

“Təxminən 2008-ci ildə iki gün öncə həbs olunan, jurnalist adına ləkə gətirən Surxay Əliyev (“Bizim dövr” qəzetinin baş redaktoru - red.) məni və yaxınlarımı şantaj etməyə başladı... Naməlum və dövlət əleyhinə olan proyektləri maliyyələşdirməyi tələb etdi... Mən rədd cavabı verdim! Mənim və yaxınlarım haqqında heç bir məntiqi və mənası olmayan iyrənc məqalələr yazıldı... Hüquq mühafizə orqanları bu faktlara göz yumdular...”

Gülağa Tənha bildirib ki, bəzi məmurlar dövlətin maraqlarını deyil, öz şəxsi maraqlarını güdür... Və nəticədə Azərbaycan mətbuatını çirkaba yuvarlayırlar.

İş adamı məsələ ilə əlaqədar ölkə başçısına və aidiyyəti qurumlara müraciət edərək, qondarma mətbuatla mübarizənin sərtləşdirilməsini istəyib.