Dünya şöhrətli rejissor Stiven Spilberq 120 milyon sterlinq (195 mln AZN) dəyərində, 80 metr uzunluğunda olan "Yeddi dəniz" (Seven Seas) adlı super lüks yaxtasını "çox balaca" hesab elədiyi üçün satışa çıxarıb.

Axar.az xəbər verir ki, amerikalı rejissorun 91 metr uzunluğunda yeni yaxta sifariş verdiyi və bu yeni yaxtanın təxminən, 160 milyon sterlinqə (260 mln min AZN) başa gələcəyi açıqlanıb.

Qeyd edək ki, rejissorun Hollandiyanın "Oceanco" şirkətinin istehsalı olan "Yeddi dəniz" (Seven Seas) adlı yaxtası nəhəng hovuz, kino zalı, 12 qonağın qarşılana biləcəyi yeddi lüks mənzil, bir vertolyot sahəsi, idman zalı və spa salonundan ibarətdir.

Hazırda həmin yaxtanı həftədə 1.2 milyon dollara kirayəyə götürən Spilberq 2013-cü ildə arvadı və yeddi uşağı ilə birlikdə bu yaxta ilə uzun dünya turuna çıxaraq Şanxaydan Havay adalarına qədər məşhur filmlərini çəkdiyi məkanları ziyarət edib. Spilberqin bu səyahətdən böyük zövq aldığı və buna görə dostları və ailəsi ilə birgə rahat səyahətlərə çıxa bilmək üçün yeni yaxta hazırlatmaq qərarı verdiyi iddia edilir.