Teatrın uğurları onun repertuarından və peşəkarlığından asılıdır.

Bu sözləri Azərbaycan Dövlət Kukla Teatrının aktyoru Rəhim Rəhimov teatrlara tamaşaçı rəğbətinin azalması ilə bağlı Axar.az-a danışarkən deyib. Aktyor Kukla Teatrında tamaşaların anşlaqla keçdiyini bildirib:

"Şükür Allaha ki, bizim teatrda hər şey yaxşıdır, tamaşaçıların böyük rəğbəti var. Hətta tamaşalara biletlər 2-3 həftə öncədən satılır. Bayram vaxtlarında isə bizim teatrda yer tapmaq olmur. Hər kəs öz övladını gətirir. Ümumiyyətlə, düşünürəm ki, bir teatrın repertuarında maraqlı tamaşalar varsa, deməli, o teatra tamaşaçının rəğbəti də, diqqəti də həmişə olacaq.

Mən serial və filmlərdə də rol alıram. Amma deyərdim ki, ən çətini Kukla Teatrında çalışmaqdır. Çünki sən gərək o kukla ilə doğmalaşasan ki, o rolu oynaya biləsən. Mənim bu günə qədər çox kukla ilə birlikdə rolum olub. Amma mənim üçün ən sevimlisi Nizami Gəncəvinin kuklası olub".