Mədəniyyət və Turizm Nazirliyinin, Avropa Azərbaycan Cəmiyyətinin (TEAS) və Atçılıq Federasiyasının (ARAF) birgə təşkilatçılığı ilə Britaniya kraliçası II Yelizavetanın 90 illik yubiley tədbirlərində Azərbaycan nümayəndə heyəti təmsil olunur.

Mədəniyyət və Turizm Nazirliyindən Axar.az-a verilən məlumata görə, tədbirdə Azərbaycan Mədəniyyəti Pavilyonu fəaliyyət göstərir. Bu pavilyon Azərbaycanın zəngin mədəniyyətini, adət-ənənələrini, folklorunu, mətbəxini əks etdirir. Burada qonaqlara əl işi olan əlvan xalçalar, milli geyimlər, suvenirlər, ədəbiyyat, memarlıq nümunələrinin sərgisi keçirilir.

Yubiley tədbirində həmçinin, Mədəniyyət və Turizm Nazirliyinin təşkilatçılığı ilə Fikrət Əmirov adına Azərbaycan Dövlət Mahnı və Rəqs Ansamblı tərəfindən konsert proqramı xarici qonaqlara təqdim olunur. Ansambl əməkdar mədəniyyət işçisi Elçin Abbasov, əməkdar artist, kamaça ifaçısı Toğrul Əsədullayev və Xamis Cəfərov tərəfindən müşayiət olunur.

Azərbaycan pavilyonu dünyanın müxtəlif ölkələrindən gəlmiş xarici turistlərin ən çox ziyarət etdiyi pavilionlar sırasındadır.