Əslən azərbaycanlı olan Türkiyədə yaşayan milyarder Rza Zərrabın 7 milyon avroluq kiçik sarayı xatırladan gəmisi görüntülənib. 45,78 metr uzunluğunda, 8,30 metr genişliyində olan gəmi özəl xüsusiyyətlərə malikdir.

Axar.az xəbər verir ki, təxminən bir aydır "60 Years" (60 il) adlı gəmiləri ilə Bodrumda istirahət edən Əbru Gündəş və Rza Zərrab cütlüyünün sarayı xatırladan gəmisi 2012-ci ilin sentyabrında "Yaxt Türkiyə" jurnalının üz qabığı olub.

Yaxtanın istehsalına 2010-cu ilin oktyabrında başlanılıb. İki ay ərzində əhatəli testlərdən keçən "üzən saray" "Royal Craft Yachting" tərəfindən 2012-ci ilin iyununda suya endirilib. Avqust ayında sahibinə təhvil verilən yaxta 2012-ci ildə Monakoda yaxta şousunda sərgilənib.

Poladdan inşa edilən gəminin gövdəsi və yuxarı hissəsi Bodrumda, daxili dizaynı isə İstanbulda tamamlanıb.

Yaxtanın ən maraqlı xüsusiyyəti isə adının "60 Years" olmasıdır. Zərrabın sinəsində də "İl 60" adlı bir döymə var. O, Gündəşlə evlənərkən "60 il ayrılmayacağıq" demişdi.