17:21

Qətərin paytaxtı Dohada baş verən partlayış HƏMAS rəsmilərinə qarşı sui-qəsd cəhdi olub.

Axar.az xəbər verir ki, bu barədə “Axios” nəşri məlumat yayıb.

İsrail ordusunun məlumatına görə, hədəf alınan şəxslər uzun illərdir HƏMAS-ın rəhbərliyində yer alıblar və 7 oktyabr qətliamının təşkilində, eləcə də İsrailə qarşı aparılan müharibənin idarə olunmasında birbaşa məsuliyyət daşıyırlar.

Bildirilib ki, partlayış zamanı HƏMAS-ın bütün rəhbərliyi, o cümlədən Xalid Məşal, Musa Əbu Mərzuq, Hussam Bədran, Razi Həməd, Zahir Cabarin, Xəlil əl-Haya və Məhəmməd Dərviş qərargahda olub.

“Əl Hədat” nəşrinin məlumatına görə, HƏMAS-ın Qəzzadakı lideri, hərəkatın xaricdəki ofisinin rəhbəri və İordan çayının qərb sahilindəki radikal bölmələrin komandiri öldürülüb.

***

Dohada baş verən partlayışda danışıqlar aparan nümayəndə heyətinin rəhbəri və Qəzza zolağındakı hərəkatın lideri Xəlil əl-Haya da daxil olmaqla, HƏMAS Siyasi Bürosunun üzvləri sağ qalıb.

Bu barədə “Əl-Cəzirə” məlumat yayıb.

***

HƏMAS İsrailin Dohaya endirdiyi zərbə nəticəsində həlak olanların danışıqlarda iştirak edən nümayəndə heyətinin üzvləri olması barədə xəbərləri təkzib edib.

Bu barədə qruplaşmanın bəyanatında deyilir.

“İsrailin Dohaya endirdiyi zərbə nəticəsində altı nəfər, o cümlədən Qəzzadakı HƏMAS liderinin oğlu Xəlil əl-Heyi həlak olub.

İsrailin zərbəsi HƏMAS-ı danışıqlarda mövqeyini dəyişməyə məcbur etməyəcək, lakin Netanyahunun sülh istəmədiyini sübut edir”, - deyə bildirilib.