Avropa Birliyinə inteqrasiya prosesi Şərqi Avropa ölkələrindən mütəxəssislərin emiqrasiyasına səbəb olub.

Axar.az xəbər verir ki, bu sözlər Beynəlxalq Valyuta Fondunun hazırladığı hesabatda yer alıb. Hesabata əsasən, bu emiqrasiya Şərqi Avropa ölkələrinin ümumi daxili məhsul artımının 7% düşməsinə səbəb olub:

"Son 25 ildə bu ölkələri 20 milyon gənc mütəxəssis tərk edib. Nəticədə Şərqi Avropa ölkələrinin vəziyyəti pisləşib. Böyük emiqrasiya istehsal həcminin artım tempini zəiflədir".

Qeyd edək ki, Şərqi Avropa ölkələri Avropa Birliyinə 2004-cü ildən üzv olmağa başlayıblar. İlkin olaraq ittifaqa Çexiya, Macarıstan, Polşa, Slovakiya, Sloveniya, Estoniya, Latviya, Litva, daha sonra isə Bolqarıstan və Ruminiya, Xorvatiya daxil olublar.