ABŞ Prezidenti Donald Tramp administrasiyasının qeyri-sabit xarici siyasəti Avropa ölkələrinin Mərkəzi Kəşfiyyat İdarəsi (MKİ) ilə əməkdaşlıq imkanlarına olan inamını sarsıdıb.

Axar.az xəbər verir ki, bunu “Politiko” qəzeti mənbələrə istinadən yazıb.

Mənbələrin sözlərinə görə, MKİ direktoru Con Retklif məxfi səfərlə Brüsselə gedib. O, Avropa Birliyinin rəsmiləri ilə görüşərək kəşfiyyat məlumatlarının mübadiləsi ilə bağlı narahatlıqları aradan qaldırmağa çalışıb.

Qeyd olunub ki, bəzi AB ölkələri Tramp dövründə ABŞ-ın xarici siyasətinin istiqamətindən narahatdırlar. Onlar üçün problem Tramp administrasiyasının siyasətində gözlənilməz dəyişikliklər olub.

Bundan əvvəl MKİ-nin sabiq əməkdaşı Larri Conson Avropa ölkələrinin müharibəyə hazır olmadığını, buna baxmayaraq, Rusiya ilə qarşıdurmanı alovlandırmağa davam etdiklərini bildirmişdi.