Rusiyanın Ukrayna ilə həmsərhəd bölgələrində Şimali Koreyanın 10 minə yaxın əsgəri var.

Axar.az xəbər verir ki, bu barədə “Telegraf” nəşri yazıb.

Nəşr qeyd edir ki, onlar Ukrayna Silahlı Qüvvələrinə qarşı döyüşlərdə iştirak etmirlər, döyüşlərin getdiyi ərazilərin minalardan təmizlənməsi ilə məşğuldurlar.

Nəşrin məlumatına görə, Şimali Koreya qoşunlarının minalardan təmizləndiyi ərazi məhz Ukrayna Silahlı Qüvvələrinin müxtəlif vaxtlarda daxil olduğu Kursk və Belqorod vilayətləridir. Rusiya mediası daha əvvəl Ukrayna qoşunlarının tank və piyada əleyhinə minalardan ibarət “görünməmiş sıxlıq” buraxdığından şikayət etmişdi. Mina təhlükəsi səbəbindən bu ərazilər mülki əhalinin geri qayıtması üçün çox təhlükəli olaraq qalır.

“Rusiyanın minalardan təmizləmə əməliyyatlarında Şimali Koreyanın mühüm rolu hər iki tərəfin hərbi əlaqələrini inkişaf etdirmək istəyini göstərir”, - məlumatda bildirilib.