İrəvandakı Azadlıq meydanında "Sasna çrer" silahlı qrupuna dəstək məqsədi ilə mitinq başlayıb.

Axar.az xəbər verir ki, meydana xeyli şəhər sakini toplaşıb. Mitinqi kinorejissor Tiqran Xzmalyan aparır. O, tribunaya Antiböhran Koordinasiya Şurasının üzvlərini dəvət etsə də, heç kim gəlməyib.

Xzmalyan "Sasna çrer" qruplaşmasının təslim olmaq qərarını "Ermənistanda vətəndaş müharibəsinə yol verməmək üçün atılan addım" kimi dəyərləndirib. Aksiya iştirakçıları isə "Sasna çrer"in təslim olmaq qərarına inanmadıqlarını və praktik addım atmağın vacibliyini tələb ediblər.

"Nyus.am" saytı mitinqdə gərginliyin yaşandığı, etirazçıların bir-biri ilə bu xəbərə görə mübahisə etdiyini bildirir.

Xzmalyan birinci mərhələnin uğurla başa çatdığını vurğulayıb və siyasi hərəkatın başladığını elan edib. Bu sözlərdən sonra mikrafonu söndürən rejissor mitinqin sabah 19:30-da davam edəcəyini bildirib.

Bir neçə şəxs çıxış üçün söz istəsə də, Xzmalyan "çekistləri yaxına buraxmırıq" deyə, onlara imkan verməyib. Bu sözlərlə özlərini təhqir olunmuş sayan gənclər isə tribunaya qalxıblar, ancaq çıxış edə bilməyiblər, əvəzində mübahisə yaranıb.

Mitinq bu qarışıqlı içində davam edir.