Ukrayna prezidenti Krımla sərhəddə və Donbasla bütün təmas xəttindəki orduların tam döyüş hazırlığı vəziyyətinə gətirilməsi haqqında əmr verib.

Axar.az xəbər verir ki, bu haqda məlumat Ukrayna Prezidenti Pyotr Poroşenkonun Tvitter hesabından yayılıb.

Qeyd edək ki, dünən Rusiya Federal Təhlükəsizlik Xidməti Krımda terror törədilməsinin qarşısını aldığını bəyan edib. FTX bu terroru ukraynalı diversantların törətdiyini bildirib. Rusiya Prezidenti Vladimir Putin isə Ukraynanı terrorizmdə günahlandırıb.

Ukrayna bu ittihamların heç birini qəbul etməyib. Bəzi ukraynalı siyasətçilər bunu FTX-nın provokasiyası adlandırıblar.