Tammiqyaslı müharibənin əvvəlində Kiyevin tez bir zamanda ələ keçirilməsi ssenarisinin uğursuzluğu Ukrayna kəşfiyyatının hazırlığı və Qərb kəşfiyyat orqanları ilə əməkdaşlığının nəticəsidir.

Axar.az xəbər verir ki, bu barədə “Quardian” qəzeti məlumat yayıb.

Məlumata görə, Ukrayna Müdafiə Nazirliyinin Baş Kəşfiyyat İdarəsi və onun o vaxtkı rəhbəri Kirill Budanov 24 fevral 2022-ci ildən əvvəl genişmiqyaslı müharibəyə hazırlaşmağa başlayıb:

“Siyasi dairələr işğal ehtimalına şübhə ilə yanaşsa da, sözügedən kəşfiyyat idarəsi paytaxta hücum halında qapalı hazırlıq işləri aparıb. Rusiya kəşfiyyatı işğal ərəfəsində Ukraynadakı kəşfiyyat və təxribat əməliyyatlarını genişləndirib. Rus casusları təkcə məmurlarla deyil, həm də dövlət aparatının aşağı səviyyələrinin nümayəndələri ilə əlaqə qurmağa çalışıblar. Bu şəraitdə Ukrayna hərbi kəşfiyyatı Rusiyanın genişmiqyaslı hərbi təcavüzü və Ukraynaya hücumu halında qeyri-rəsmi hazırlıq tədbirləri həyata keçirib. Söhbət paytaxta potensial hücum da daxil olmaqla, kəskin eskalasiya ssenarilərindən gedir. Qostomeldəki hava limanı Rusiyanın planlarında əsas rol oynayıb və Kiyevi ələ keçirmək əməliyyatında əsas element kimi qəbul edilib. Moskva Ukrayna paytaxtı üzərində nəzarəti tezliklə ələ keçirməyə ümid edirdi, lakin Qostomel, Moşun və İrpin uğrunda döyüşlər bu ssenarini alt-üst etdi. Ukrayna kəşfiyyat xidmətləri yüksək qeyri-müəyyənlik şəraitində fəaliyyət göstərsə də, onların işi ən pis ssenarinin qarşısını almağı təmin etdi”.