ABŞ kəşfiyyatı belə qənaətə gəlib ki, Çin davam edən atəşkəs və gərginliyin azaldılması üzrə diplomatik səylərə baxmayaraq, İrana silah tədarükünə hazırlaşa bilər.

Axar.az xəbər verir ki, bu barədə CNN son kəşfiyyat qiymətləndirmələri ilə tanış olan mənbələrə istinadən məlumat verib.

Amerika kəşfiyyatının məlumatına görə, söhbət hava hücumundan müdafiə sistemlərinin, o cümlədən daşınan zenit-raket komplekslərinin mümkün ötürülməsindən gedir. Bu cür sistemlər aviasiya üçün ciddi təhlükə yarada və İranın müdafiə imkanlarını əhəmiyyətli dərəcədə gücləndirə bilər.

Mənbələrin bildirdiyinə görə, tədarükün vasitəçilər yolu ilə həyata keçirilməsi sxemi nəzərdən keçirilir. Silahlar birbaşa Çindən İrana deyil, üçüncü ölkələr üzərindən göndərilə bilər ki, bu da onların mənşəyini gizlətməyə və Pekin üçün siyasi riskləri azaltmağa imkan verər.

Kəşfiyyatın qiymətləndirməsinə əsasən, İran döyüş əməliyyatlarındakı mövcud fasilədən öz hərbi imkanlarını bərpa etmək üçün istifadə edə bilər. Xüsusilə, ABŞ və müttəfiqlərinin zərbələri nəticəsində zədələnmiş hərbi infrastrukturdan sonra arsenalın yenidən doldurulmasından söhbət gedir. Belə bir məqamda hava hücumundan müdafiə sistemlərinin tədarükü, xüsusilə atəşkəs müvəqqəti olarsa, qüvvələr balansını ciddi şəkildə dəyişə bilər.

Qeyd olunub ki, ehtimal olunan tədarüklər müdafiə xarakterli kimi təqdim oluna bilər:

“Lakin daşınan zenit-raket kompleksləri yalnız müdafiədə deyil, həm də aktiv döyüş əməliyyatlarında, o cümlədən aviasiyaya qarşı hücumlarda istifadə oluna bilər. Bu cür sistemlər artıq müxtəlif münaqişələrdə, xüsusilə asimmetrik müharibə şəraitində effektivliyini göstərib”.