ABŞ və Ukrayna arasında münasibətlərdə yaranan son böhran 2025-ci ilin qaranlıq günlərini xatırladır. Həmin vaxt Ukrayna və ABŞ prezidentləri Vladimir Zelenski və Donald Tramp, eləcə də ABŞ-ın vitse-prezidenti Ceyms Di Vensin Oval kabinetdə baş verən və geniş rezonans doğuran mübahisəsi Amerikanın artıq Rusiyanın tərəfində olduğu ilə bağlı narahatlıqları reallığa çevirmişdi. Tramp və Rusiya Prezidenti Vladimir Putinin Alyaskada keçirilən sammiti isə bu narahatlıqları daha da gücləndirmişdi.

Axar.az xəbər verir ki, bu barədə beynəlxalq şərhçi Gideon Rəhman "Faynənşl Tayms" üçün yazdığı məqaləsində bildirib.

“Ukrayna prezidenti ABŞ-ı Ukraynaya peyk dəstəyini məhdudlaşdırmaqda açıq şəkildə ittiham edir və Vaşinqtonun Rusiya enerji obyektlərinə zərbələrin dayandırılması istiqamətində göstərdiyi təzyiqə qarşı çıxır. Eyni zamanda, Avropa Rusiya Prezidenti Vladimir Putinlə dialoqu bərpa etmək imkanını nəzərdən keçirir.

Zelenskinin açıq bəyanatları, ola bilsin ki, böyük ölçüdə qəzəb və narazılıqdan qaynaqlanır. Lakin onun ritorikasındakı dəyişikliyin arxasında müəyyən siyasi hesablamalar da dayanır. Son vaxtlar Trampın sorğulardakı mövqeləri zəifləyib və Respublikaçılar Partiyası aralıq seçkilərdə məğlubiyyətlə üzləşə bilər. Ukrayna hökuməti tez-tez gözlənilməz davranan ABŞ prezidentini növbəti dəfə sakitləşdirməyə çalışmaq əvəzinə, prezidentin və onun ətrafının vasitəçiliyindən yan keçərək birbaşa Amerika ictimaiyyətinə müraciət etməyi qərara alıb.

Avropanın Rusiyaya yanaşmasında da mühüm dəyişiklik baş verib. Avropa paytaxtlarında belə bir fikir getdikcə daha çox dəstək qazanır: qitə liderləri Putinin yalnız amerikalılarla danışıqlar apardığı vəziyyətə artıq dözməməlidirlər. Rusiya tərəfi ilə əlaqə kanalları artıq açılıb və yaxın vaxtlarda Avropa liderləri ilə Putin arasında telefon danışığı baş tuta bilər.

Yanaşmadakı bu dəyişiklik Trampa təsir göstərmək cəhdlərinin getdikcə daha az nəticə verdiyi qənaətini əks etdirir. Ukrayna və Avropa hesab edirlər ki, hazırda ABŞ prezidenti bütün diqqətini aralıq seçkilərə yönəldib. Bundan əlavə, Trampın fikrincə, Avropa İran məsələsində ona kömək etməyib”, - G.Rəhman qeyd edib.