Hindistan Pakistandan 8 diplomatını geri çağırıb.

Axar.az xəbər verir ki, rəsmi Dehli belə addım atmağına əsas səbəb kimi diplomatların təhlükəsizliyinə olan təhdidi göstərib. Geri çağırılan diplomatlar arasında 1 müşavir, 2 birinci katib, 1 attaşe və 4 diplomatik korpus işçisi var.

Qeyd edək ki, bir müddət öncə Pakistan da 6 diplomatını Hindistandan geri çağırıb. Rəsmi İslamabad bu addımını diplomatların həyatına təhlükə olması ilə bağlı atdığını bildirib. Üstəlik, Hindistanın keçən həftə Pakistan səfirliyinin əməkdaşı Mahmud Axtarı həbs edib, casusluqda günahlandıraraq ölkədən qovması da İslamabadı belə addıma məcbur edən səbəblərdən biri olub.

Hindistan-Pakistan münasibətləri son bir ay ərzində gərginləşib. Tərəflər arasında toqquşmalar artıb. İndiyə qədər hər iki tərəfin atəşkəsi pozması nəticəsində 20-dən çox şəxs həyatını itirib.