Noyabrın 5-də Fransanın Korsika adasının Ajaççio və Marsel şəhərlərinin polis əməkdaşları nümayiş keçiriblər.

"Axar.az"ın xəbərinə görə, Ajaççio prefekturası qarşısına toplaşan yüzlərlə polis işçisi Daxili İşlər naziri Manuel Vallsdan onların sosial şəraitlərinin yaxşılaşdırılması ilə bağlı verdiyi vədi yerinə yetirməyi tələb edib.
Ölkənin ən böyük limanı hesab olunan Marsel şəhərinin prefekturası qarşısında toplaşan iki mindən artıq polis dövlət büdcəsində onların təhlükəsizliyi ilə bağlı vəsaitin nəzərdə tutulmamasına, təqaüd islahatları ilə əlaqədar əmək haqlarının dondurulmasına, gənc polislərə təhlükəyə görə kompensasiya ödənilməməsinə etirazlarını bildirib və hökumətə onların sosial vəziyyətlərinin yaxşılaşdırılması istiqamətində tədbirlər görməyə çağırıblar.

Polislər tələbləri yerinə yetirilmədiyi təqdirdə digər şəhərlərin polislərinin həmrəyliyi ilə noyabrın 13-də daha izdihamlı nümayiş keçirəcəkləri barədə hökumətə xəbərdarlıq ediblər.