Almaniya kansleri Angela Merkel İtaliya naziri Paolo Gentiloninin axtarışda olan Anis Amrinin polisə atəş açdıqdan sonra yaranan qarşıdurmada öldürüldüyü haqda məlumat yaydığını bildirib.

Axar.az xəbər verir ki, o, buna görə italyan polisinə təşəkkür edib.

Merkel Amrinin öldürülməsindən sonra da Almaniyada hücumlarla əlaqədar istintaqın davam edəcəyini və təhlükəsizlik qüvvələrinin bu istiqamətdə işlərini davam etdirəcəyini vurğulayıb:

"Onlar (təhlükəsizlik qüvvələri) Amrinin fəaliyyəti barədə məlumat əldə edənədək dayanmayacaqlar. Kim dəstək verib, yaxud onu qoruya bilər? Başqa günahkarlar və ya kömək edənlər varsa, onların hesabı veriləcək. Terrorizm bizə meydan oxuyur".

Xatırladaq ki, Berlində törədilmiş terror aktında şübhəli bilinən 24 yaşlı tunisli Anis Amri haqqında rəsmi axtarış elan edilmişdi. Cümə günü məlum olub ki, Amri İtaliyada polislə atışmada öldürülüb.