Türkiyənin Sincar və Qaraçoq əməliyyatından sonra ABŞ əsgərləri sözügedən bölgədə PKK terror təşkilatının yüksək rütbəli üzvləri ilə görüntülənib.

Axar.az xəbər verir ki, ABŞ hərbçilərinin PKK liderlərini ziyarət etməsi Türkiyə tərəfindən birmənalı qarşılanmayıb.

Türkiyənin Anadolu Agentliyinin jurnalisti hadisə ilə bağlı ABŞ Dövlət Departamentinin sözçüsü Mark Tonerə belə bir sual ünvanlayıb: “PKK-nı terror təşkilatı kimi qəbul etdiyinizi deyirsiniz, lakin Türkiyənin əməliyyatından sonra ABŞ hərbçiləri həmin bölgəyə gedib və yüksək rütbəli PKK liderləri ilə görüşüb. Bunu necə izah edə bilərsiniz?”

Toner sualdan yayınaraq, “Həmin fotonu görməmişəm. Məncə, bu sualda ABŞ hərbçisinə qarşı hörmətsizlik var”, - deyib.

Qeyd edək ki, Türkiyə qırıcıları Suriya və İraqda son əməliyyatlar zamanı 70-ə yaxın PKK terrorçusunu zərərsizləşdirib. Bu hücum ABŞ, Rusiya və İran tərəfindən narahatlıqla qarşılanıb.

Olaydan dərhal sonra isə ABŞ-ın yüksək rütbəli hərbçisinin bölgəyə getdiyini və PKK-çılarla görüşdüyünü təsdiqləyən fotolar yayılıb.