Koalisiya qüvvələrinin İraq və Suriyada 2014-cü il avqustundan bu vaxta qədər endirdiyi hava zərbələri nəticəsində 352 dinc sakin həlak olub.

Axar.az xəbər verir ki, bu barədə koalisiya qüvvələrinin rəsmi məlumatında bildirilib. Ancaq etiraf edilən bu rəqəmlər digər rəsmi rəqəmlərlə üst-üstə düşmür.

Belə ki, İraq rəsmiləri yalnız 17 mart tarixində Mosula endirilən zərbələrdə 100 dinc sakinin öldüyünü açıqlayıb. “Airwars” müstəqil monitorinq qrupu isə mart ayı ərzində koalisiya qüvvələrinin endirdiyi zərbələrdə 1782 günahsız insanın öldüyünü təsdiqləyib.

ABŞ Silahlı Qüvvələri Mərkəzi Komandanlığı da fərqli rəqəm açıqlayıb. Ötən ay ictimaiyyətə təqdim edilən hesabatda 2014-cü ilin avqustundan 2017-ci ilin martınadək Suriya və İraqda təsadüf nəticəsində 396 dinc sakinin öldüyü qeyd edilirdi.