Yəmənin Şəbva şəhərindəki qarşıdurmada aralarında 7-si əsgər olmaqla 14 adam həyatını itirib.

"Axar.az" xəbər verir ki, ölənlər arasında Müdafiə nazirinin köməkçisi də var. Hadisə paytaxt Sananın cənubundakı Şəbva şəhərində Azzan qəbiləsinin yaşadığı Cevlur-Ride bölgəsində təhlükəsizlik qüvvələri ilə Əl-Qaidə üzvləri arasında yaranan qarşıdurma zamanı baş verib.

Hadisə şahidləri Müdafiə nazirinin məsləhətçisi Mühsin Hüseyn Səid və 7 əsgərin güllələndiyini, hər iki tərəfdən çoxsaylı yaralı olduğunu bildiriblər.

Digər tərəfdən şahidlər Əl-Qaidə təşkilatına mənsub bir qrupun Azzandakı polis mərkəzini ələ keçərdiyini iddia edir.

Xatırladaq ki, bir müddət öncə Yəmən Təhlükəsizlik strukturları və Xalq komitəsi Əl-Qaidəyə qarşı əməliyyatlara başlamışdı. Ölkənin cənubunda keçirilən əməliyyatlardan sonra Sana və böyük şəhərlərdə fövqəladə vəziyyət elan edilmişdi.