Ukraynanın Yaşıllar Partiyasının sədri Denis Moskal Ukrayna ilə Rusiya arasında baş verə biləcək müharibənin dağıntısının Çernobıl facəsindən də ağır nəticələrə gətirəcəyini vurğulayıb.

"Axar.az" xəbər verir ki, Moskal Ukrayna ərazisində texnogen tipli müəssisələrin çoxluğunun müharibə zamanı misli görünməmiş fəlakətlərə gətirib çıxaracağını bildirib.O, fikirlərini bəzi məqamlarla izah edib:

"Nədənsə bəzi önəmli məqamlara toxunmaqdan çəkinirlər. Qətiyyən müharibənin alovlanmasına, genişlənməsinə və başlanmasına imkan vermək olmaz. Çünki Ukrayna ərazisində yetərincə texnogen tipli müəssisələr, təhlükəli atom və su elektrik stansiyaları fəaliyyət göstərir. Bundan başqa, ölkə ərazisindən qaz nəql olunur. Əgər qarşıdurmalar dayanmasa, nəticə Çernobıl qəzasından da betər olacaq".

Partiya sədri həmçinin Rusiyaya da müraciət edib. Əlavə edib ki, qonşu dövlət kimi, Rusiya aqressiv siyasətindən əl çəkməlidir:

"Ukraynada baş verəcək istənilən qəza Rusiyanın ərazisində də hiss olunacaq, Rusiya da bundan əziyyət çəkəcək".

Xatırladaq ki, Moskal dünya birliyini də tənqid etməyi unutmayıb. O, əksər ölkələri Ukrayna məsələsində etinasız qalmaqda qınayıb.