Hələ Ukrayna hadisələrinin ilk günlərində Rusiyanın ciddi müqaviməti ilə üzləşildiyini görən bəzi çevrələr bu ölkədə yay aylarında baş verəcək təbii fəlakətləri səbirsizliklə gözləməyə başladılar.

"Axar.az" ukraynalı bloggerlərə istinadən xəbər verir ki, artıq həmin hadisələrə start verilib. Söhbət həm də mülayim iqlim qurşağında yerləşən Rusiyada qatı meşə zolaqlarının, həmçinin tez alışan torf örtüklərinin sürətlə alovlanmasından, yanğından irəli gələn boğucu tüstü qatının iri şəhərləri, meqapolisləri bürüməsindən gedir.

Xatırladaq ki, bir neçə il bundan öncə Moskva ətrafında yaranan silsilə meşə yanğınları günlərlə Rusiya paytaxtının həyat tərzini iflic vəziyyətinə gətirmişdi. Rusiya hökuməti bu fəlakətin önündə aciz duruma düşmüşdü. Yardım əlini uzadan ölkələr arasında ölkəmiz də var idi. Azərbaycanın Föqəladə Hallar Nazirliyinin texnikası və peşəkar şəxsi heyyəti üzərinə götürdüyü işin öhdəsindən layiqincə gəldi.

İndi ukraynalı bloggerlərin "Rusiya od içindədir" sərlövhəli yazıları əslində elə dediklərimizə dəlalət edir. 17 maya olan məlumata görə, hazırda Omsk və Tomsk vilayətləri od içindədir. Bildirilir ki, indi alovun miqyası genişlənəcəyi təqdirdə Avropa yardım əlini uzatmayacaq.