Odessa şəhərində Rusiyanın Rostov vilayətinin Ukraynaya birləşdirilməsi ilə bağlı referendum keçirilib.

"Axar.az"ın məlumatına görə, səsvermənin nəticəsində bəlli olub ki, sözügedən Rusiya subyekti Ukraynanın tərkibinə keçməyə hazırdır. Bu referendumun keçirilməsi bəzi dairələrdə qəribə tonda qarşılansa da, prosesin təşkilatçıları tamam başqa fikirdədirlər. Onların qənaətinə görə, rusiyameylli separatçılar da elə bu formada referendum "keçirirlər" - qəfil, ani və heç bir mərkəzi seçki orqanı ilə hesablaşmadan.

Referendumu keçirən Xalq Mərkəzi Seçki Komissiyasının sədri Andrey Pavlenko bildirib ki, proses uğurla başa çatıb, referendumda böyük növbələr yaranıb. Maraqlıdır ki, Rostov sakinləri SMS vasitəsi ilə məramlarını ifadə ediblər. Bütün bunların nəticəsində belə bir arayış verilib ki, Viktor Yanukoviç də daxil olmaqla, Rostov vilayəti Ukraynaya birləşməyə hazırdır.