İraq hökuməti Türkiyəni Beynəlxalq Ticarət Palatası nəzdində yerləşən arbitraj məhkəməsinə verib.

Axar.az xəbər verir ki, Türkiyə Enerji və Təbii Sərvətlər naziri Taner Yıldızın Şimali İraq neftinin ixrac edilməsi ilə bağlı açıqlaması rəsmi Bağdadın sərt reaksiyasına səbəb olub.

İraq Neft Nazirliyindən verilən açıqlamaya görə, İraq Türkiyənin BOTAŞ şirkəti barədə mərkəzi Parisdə yerləşən arbitraj məhkəməsində istintaq işinin açılması üçün müraciət edib.

Açıqlamada Türkiyənin Şimali İraq Regional Rəhbərliyinə məxsus neftin İraq Neft Nazirliyinin razılığı olmadan ixrac etdiyi, həmçinin İraq-Türkiyə arasında imzalanan neft kəməri ilə bağlı müqavilənin müddəalarını pozduğu bəyan edilib.

Türkiyəli səlahiyyətli nümayəndələr İraqın müraciəti barədə Türkiyə hökumətinə hələ də rəsmi məlumat daxil olmadığını bildirib.

Xatırladaq ki, Taner Yıldız Şimali İraq neftinin Ceyhan neft kəməri vasitəsi ilə ixrac edilməyə başladığını açıqlamışdı.