Böyük Britaniyanın Baş naziri Tereza Meyin populyarlıq reytinqi son bir ildə rekord aşağı göstəriciyə enib.

Axar.az xəbər verir ki, bu barədə məlumat "Axşam standartı" (“Evening Standard”) qəzetində dərc olunan sorğuda əks olunub. Sorğunun nəticəsində rəy bildirən vətəndaşların 59 faizi Tereza Meyin Baş nazir vəzifəsinin icrasından narazı qaldığını, 34 faizi isə hökumət başçısının işini məqbul qiymətləndirib.

Bu, Tereza Meyin keçən ilin müvafiq dövründə Baş nazir postuna gəldiyi vaxtdan bəri ən aşağı göstəricidir.

Hökumətin işinin ümumi qiymətiləndirilməsində isə respondentlərin 64 faizi məyus olduğunu ifadə edib, onların 28 faizi Nazirlər Kabinetinin fəaliyyətindən razı qaldığını bildirib.

Sorğu mindən çox Britaniya vətəndaşının iştirakı ilə iyulun 14-18-də keçirilib.

Xatırladaq ki, Tereza Meyin başçılıq etdiyi mühafizəkarlar partiyası iyunun 8-də keçirilən növbədənkənar parlament seçkilərində qələbə qazansa da, hakim çoxluğu itirib.