Talibanın 5 il əvvəl qaçırtdığı ABŞ hərbi qüvvələrinin əsgəri Bov Berqdah Quantanamo həbs düşərgəsində olan 5 Taliban lideri qarşılığında sərbəst buraxılıb.

Axar.az xəbər verir ki, bu barədə Əfqanıstan xəbər agentlikləri məlumat yayıb. Buraxılan Taliban liderlərininin arasında Kəşfiyyat rəisinin köməkçisi Abdul Haqq Vasiq, 2001-ci ildə Amerika ilə döyüşən və Əfqanıstanın şimalındakı Məzarı-Şərifdə Taliban komandiri olan Molla Nuriddin Nuru, Taliban hakimiyyəti dövründə Daxili İşlər naziri olmuş Molla Ömər və Üsamə Bin Laden ilə dostluq münasibətləri olmuş Hayrullah Hayirha var.

Bu razılaşmanı Qətər hökumətinin reallaşdırdığı bildirilir. Dəyişdirilən Taliban liderləri bir müddət Qətərdə qalacaq.

Xatırladaq ki, Əfqanıstanın şimal-şərqindəki Pakdığa vilayətində xidməti vəzifəsini yerinə yetirən Bov Berqdah 2009-cu ilin iyun ayında Taliban qüvvələri tərəfindən qaçırılmışdı.