Rusiya Xarici İşlər naziri Sergey Lavrov Kiyev rəhbərliyindən Şərqi Ukraynada hərbi əməliyyatların dayandırılmasını və birbaşa dialoqların başlanılmasını tələb edib.

Axar.az xəbər verir ki, Polşa Xarici İşlər naziri Radoslav Sikorski və Almaniya Xarici İşlər naziri Frank-Valter Steyinmeyer ilə Sankt-Peterburqda bir araya gələn Lavrov əks halda Ukrayna böhranının uzun illər davam edəcəyini bildirib.

Ukraynada vəziyyətin sabitləşməyinin yeganə yolunun hərbi əməliyyatların dayandırılması olduğunu deyən rus siyasətçi separatçı olaraq xarakterizə edilən vətəndaşların bu addıma cavab verəcəklərini bildirib: "Bölgədə davam edən qarşıdurmalar heç kimin xeyrinə deyil. Evlərini və uşaqlarını müdafiə edən insanlar günahkar ola bilməz. Rəsmi Kiyevin etirazçılarla dialoqa başlamaması böhranı naməlum vaxta qədər uzadır. Müharibədə iştirak edənlər Ukrayna vətəndaşlarıdır".

Onu da bildirək ki, Ukraynanın AB ilə əməkdaşlıq müqaviləsi imzalamasına toxunan Lavrov buna görə rəsmi Kiyevə hər hansı sanksiya tətbiq edilməyəcəyini açıqlayıb. Onun sözlərinə görə, bu, ticari əməkdaşlıqdır: "Ukrayna yalnız MDB-də olan ticari üstünlüklərindən məhrum olacaq. Bu normal ticari əlaqələrdir. Sanksiya deyil".