2003-cü ildə Amerikanın İraqa hücumundan sonra bu ölkədə terror təşkilatları yaradılmağa başlayıb. Amerikaya qarşı cihad savaşı aparan təşkilatlar zamanla bir-birləri ilə vuruşublar. Bu gün İraqda İŞİD öz adını dünyaya çatdırsa da, əslində bu ölkədə tək gücə sahib deyil. Təşkilatın irəliləməsində İraqda fəaliyyət göstərən digər terror təşkilatlarının rolu da var.

Axar.az İraqda məskunlaşmış terror təşkilatlarını təqdim edir:

İraq Tayfa İnqilabçıları Hərbi Məclisi

ABŞ-ın 2003-cü ildə İraqa hücumundan sonra qurulub. Təşkilat Səddam Hüseynin dövründə İraq ordusunun zabitləri, müqavimət qrupları və tayfalar tərəfindən Mosulda yaradılıb. Ninova, Fəllucə və Ramadi kimi şəhərlərdə təsirə sahib olan qruplaşmanın İŞİD-in Mosulu almasında yardımçı olduğu bildirilir. Əsasən sünnilərdən təşkil olunub.

Ənsar əl–İslam (İslamın köməkçiləri)

Təşkilat iraqlı kürdlərdən və ərəblərdən təşkil olunub. Rəhbərlikdə ərəblər, hərbi dəstələrdə isə daha çox kürdlər yer alır. 2001-ci ildə Kürdistan İslam Hərəkatı, Tövhid Hərəkatı və İkinci Soran bölüyü kimi İslamçı kürd quplardan təşkil edilən qruplaşmanın Əl Qaidə ilə əlaqələri olduğu deyilir. Bəzi qaynaqların verdiyi məlumata görə, təşkilatın üzvlərindən bəziləri Əfqanıstandakı Əl Qaidə düşərgələrində təhsil alıblar.

Ceyşul-İslam (İslam ordusu)

Suriyada 50-yə yaxın silahlı qrupun bir araya gələrək yaratdığı təşkilata Zahra Alluş əmrlik edir. Simvolu qara bayraq olan təşkilatın radikal sələfilərdən təşkil olunduğu bilinir. Təşkilat İraqda güclü media şəbəkəsinə sahibdir və son günlərdə Baxibə şəhərində İŞİD ilə qarşıdurma halındadır.

Ceyşul Mücahidin (Mücahidlər ordusu)

Anbar, Ramadi, Fəllucə kimi sünni şəhərlərdə Maliki hökumətinə qarşı əməliyyatlar aparır. Radikal sələfi anlayışına sahib təşkilatın bir qrup əsgəri son dövrlərdə İŞİD-in sıralarına qatılıb.

1920 İnqilab Briqadaları

Özünü Əhli Sünnə və Camaat etiqadına mənsub bir İslami cihad hərəkəti olaraq təyin edir. Təşkilat 2003-cü ildə ABŞ-ın İraqa girməsi ilə qurulan İraq İslami Müqavimət Hərəkatının silahlı qanadı olub. 1920 İnqilab Briqadaları öz ideologiyasına yaxın bir çox silahlı qrupu tərkibində saxlayır. Hər bir briqada təməl hərbi hərəkətlərə görə birliklərə ayrılır. Təşkilat Bağdad, Əbu Qureyb, Xan Dari, Fəlluca, Ninova, Diyala və Anbar vilayətlərində təsir sahibidir.

Baasçı Nəkşibəndi Ordusu

Səddam Hüseynin köməkçisi İzzət İbrahim əl-Durinin liderliyini etdiyi təşkilat əvvəlki rejimi bərpa etmək məqsədi güdür. Təşkilat Mosulun İŞİD-in tərkibinə keçməsinə yardım etsə də, dini anlayışı fərqlidir. Son günlərdə iki təşkilat arasında qarşıdurmalar baş verir.

İraq Şam İslam Dövləti (İŞİD)

2000-ci ildə Zerkavi Tövhid və Cihad adı ilə təşkilatı qurub. 2004–cü ildən adını eşitdirməyə başlayan təşkilat Əl-Qaidəyə qoşulmaq qərarı verib. Təşkilatın hazırki lideri Əbu Bəkir əl-Bağdadidir. Suriyada Əsəd rejiminə qarşı döyüşən təşkilat bu ölkədə fərqli qruplaşmalarla da mübarizə apardığından Əl Qaidə onun özünə bağlı olmadığını açıqlayıb.