Gecə saatlarında Ukrayna Təhlükəsizlik Şurasının gərgin keçən iclasından sonra Prezident Pyotr Poroşenko televiziya vasitəsi ilə ukraynalılara müraciət edib.

Axar.az xəbər verir ki, onun çıxışının əsas mahiyyəti separatçılara verilən atəşkəs müddətinin başa çatdığını və bundan sonra terrorçulara qarşı amansız əməliyyatların aparılacağını bəyan etməsi olub.

Ukrayna prezidenti çıxışında bir neçə əhəmiyyətli məqama toxunub. Onun sözlərinə görə, bütün təxribatlara və ölkəyə vurduğu zərərə baxmayaraq, separatçılara müəyyən müddət verilib, atəşkəs elan olunub. Lakin bu cəhdləri qarşı tərəf bunu layiqincə dəyərləndirməyib. Poroşenko bu səbəbdən ölkənin şərqində genişmiqayaslı anti-terror əməliyyatlarına başladıqlarını bəyan edib.

Rusiyanın ünvanına da bəzi ittihamlar səsləndirən Poroşenko deyib ki, sülhün bərqərar olunması ilə bağlı çağırışları təqdir olunsa da, əməldə Moskva hər hansı addım atmayıb, qoşunlarını sərhəddən geri çəkməyib.

Poroşenko sonda düşmənlə mübarizənin hər bir ukraynalılının müqəddəs borcu olduğunu vurğulamaqla, heç bir qüvvənin onların addımlarının qarşısında dirəniş gətirə bilməyəcəyini dilə gətirib.