Rusiya Xarici İşlər Nazirliyi Avropa Birliyinin (AB) ABŞ-ın təhdidinə boyun əyərək Rusiyaya qarşı sanksiya siyahısına qoşulmasını tənqid edib.

Axar.az xəbər verir ki, ABŞ-ın sanksiya siyahısını açıqlamasından sonra AB də sanksiyaya qoşulacağını və bu ayın sonunadək təqdim edəcəyi ad və şirkətlərin siyahıya əlavə olunacağını bildirib.

Mövzuyla əlaqədar Rusiya Xarici İşlər Nazirliyindən verilən şərhdə "AB öz xeyrini tapdalayaraq bizə qarşı sanksiyalara qoşulur. Biz buna təəssüflənirik", - deyə bildirilib.

ABŞ intiqam almağa çalışır

Rusiyanın xarici siyasət idarəsi qərarla bağlı onu da bildirib ki, bu, qərəzli addımdır: "ABŞ Ukrayna böhranına görə Rusiyadan intiqam almağa çalışır. Ukraynada baş verən hadisələr ABŞ-ın maraqlarına uyğun gəlmədiyi üçün bu hadisələr baş verir. Sanksiya qərarlarını belə qiymətləndiririk".

Xatırladaq ki, bu gün ABŞ prezidenti Barak Obama sanksiyaların yeni siyahısını açıqlayıb. Siyahıya Rusiya prezidentinin köməkçisi İqor Şeqolev, Krım üzrə nazir Oleq Savelev, parlamentin vitse-spikeri Sergey Neverov, qondarma Donetsk Xalq Respublikasının Baş naziri Aleksandr Boroday, o cümlədən "İmjmaş", "Bazalt", "Uralvaqonzavod", "Vneşekonombank", "Qazprombank" və "Rosneft" kimi iri şirkətlər daxil edilib.