Rusiya Prezidenti Vladimir Putinin Krıma həsr olunmuş çıxışlarından ibarət video-çarx sosial şəbəkələrdə rus və ukraynalı istifadəçilər arasında qarşıdurmaya səbəb olub.

Axar.az xəbər verir ki, bu barədə videonu “Krım reallıqları” saytının jurnalistləri hazırlayıb.

Videoda Rusiya Prezidenti Vladimir Putinin Krımla bağlı çıxışları zamanı yarımadanın Ukraynaya məxsus olması, ərazinin mübahisəli bölgə olmadığını etiraf etməsi və hər hansı bir hərbi konfliktə hazırlaşmadığı barədə açıqlamalarına yer verilib. Nəşrin jurnalistləri Putinin 10 il ərzində fəaliyyəti ilə ziddiyət təşkil edən açıqlamalarını ictimaiyyətə təqdim ediblər.

2008-ci ildə Putin Qərb jurnalistlərinə sübut edib ki, Krım şübhəsiz olaraq Ukrayna torpağıdır.

“Krım mübahisəli ərazi deyil, orada heç bir etnik qarşıdurma yoxdur. Rusiya Ukraynanın bugünki ərazisini çoxdan tanıyıb”, - Putin bildirib.

2013-cü ilin qışında isə Putin rus hərbi kontingentinin Ukraynaya məxsus yarımadayaya yeridilməsi imkanlarını təkzib edib:

“Hüquq bərabərliyi uğrunda mübarizə aparmağa davam edəcəyik. Bu bütün dövlətlərə aiddir. Bu o demək deyil ki, biz ordularımızı yeritməyə hazırlaşırıq. Bu, tamamilə cəfəngiyatdır. Belə bir şey yoxdur və ola da bilməz”.

Qeyd edək ki, 2014-cü ildə Putin yarımadaya hərbi qüvvələrin yeridilməsi barədə qərar qəbul edib.