Türkiyə Respublikasının qurucusu Mustafa Kamal Atatürkə məxsus "Savarona" adlı yaxta restavrasiya olunaraq dövlətin balansına keçib.

Axar.az xəbər verir ki, dövlət balansına keçən yaxta bundan sonra dövlət tədbirlərində istifadə olunacaq.

Yaxta hələ ötən ilin sonunda Baş nazir Rəcəb Tayyib Ərdoğanın göstərişi ilə iş adamı Kahraman Sadıkoğlundan təhvil alınmışdı.

Atatürkün iş otağı muzeyə çevrilib. Həmin otaqda ona məxsus şəkillər, fotoalbomlar, kitablar və "Savarona"ya aid sənədlər yerləşdirilib.

Qeyd edək ki, məşhur "Savarona" yaxtasında bir vaxtlar fahişə məclisləri qurulması ilə bağlı məlumatlar verilmişdi. Hələ 2010-cu ildə Türkiyə polisi keçirdiyi əməliyyat nəticəsində yaxtada fahişə məclisləri keçirməkdə şübhəli bilinən bir neçə şəxsi həbs etmişdi.

2013-cü ildə də Fransa polisinin beynəlxalq fahişə şəbəkəsilə bağlı qaldırdığı iddia da "Savarona"nın 2007-ci ildə Kann Film Festivalı zamanı 350 min avroya kirayəyə verildiyi məlum olmuşdu.

Livanlı iş adamı Elie Nahas tərəfindən kirayələnən yaxtada Liviyanın devrilmiş lideri Müəmmar Qəddafinin oğlu Mütəssimin fahişələrlə kef məclisi qurduğu iddia olunmuşdu.