Rusiya dövlət başçısının köməkçisi Yuri Uşakov jurnalistlərə verdiyi müsahibədə bildirib ki, Barrozunun sitatı düzgün göstərməməsi "diplomatiya hüdudlarını aşır".

Axar.az "RİA Novosti"yə istinadən bildirir ki, Uşakov belə bir hərəkətin ciddi siyasi xadimə layiq olmadığını vurğulayıb:

"RF prezidenti Vladimir Putinin Rusiyanın guya Kiyevi "almağa" hazır olması haqqında Avropa Komissiyasının sədri Barrozu tərəfindən sitat gətirilən sözləri kontekstdən çıxarıldığından tamam başqa məna kəsb edib".

Xatırladaq ki, İtaliyanın "Repubblica" qəzeti bu günlərdə yazırdı ki, Barrozu AB sammiti iştirakçılarına Putinlə söhbəti barədə danışarkən bildirib: "Ukraynadakı hərbçilər barədə soruşanda Rusiya lideri hədələrə keçdi".

Qəzet daha sonra Putinin sədrin dilindən söylənilən ifadəsini verir:

"Problem bunda deyil. Problem ondadır ki, istəsəm, Kiyevi iki həftəyə alaram". Barrozunun fikrincə, Putin bununla sanki deyib: "Məni yeni sanksiyalarla provokasiya etməyin".