Nigeriyanın şimal-şərqindəki Borno əyalətində "Boko Haram" terror təşkilatına qarşı əməliyyat təşkil olunub.

Axar.az xəbər verir ki, ordunun Tvitter sosial şəbəkəsindəki rəsmi hesabında verilən açıqlamada ölkənin şimal-şərqindəki Borno əyalətinin Konduqa şəhərində "Boko Haram" təşkilatı yaraqlılarının saxlandığı yerə təşkil edilən əməliyyatda 50 terroristin öldürüldüyü, bir zabitin, 3 əsgərin yaralandığı qeyd edilib.

Açıqlamada əməliyyat zamanı bir top, 2 zenit raket qurğusu, bir zirehli avtomobil və müxtəlif sursatın ələ keçirildiyi, bəzi təchizat, silah və qida maddələrinin də məhv edildiyi qeyd edilib.

Digər tərəfdən Nigeriyanın şərqindəki Adamaua əyalətinin Kolak şəhərinin də "Boko Haram" təşkilatının nəzarətinə keçdiyi bildirilib.

Hökumət sözçüsü Liman Tukar yazılı açıqlama verərək belə deyib: "Üsyançıların indi Kolakda olduqlarını, onlarla insanı öldürdüklərini və çoxlu adamı evsiz qoyduqlarını öyrəndik".

Xatırladaq ki, Borno əyalətindəki Quaoza,Yobe əyalətində Buni Yadi və Adamaua əyalətində Madaqali şəhərləri "Boko Haram"ın nəzarətindədir.