“Eirbas” (Airbus) şirkəti Malaziyanın “Eir Asiya Qrup” şirkəti ilə 23 milyardlıq müqavilə imzalaya bilər.

Axar.az xəbər verir ki, bu barədə “Blumberq” agentliyi məlumat yayıb. Agentlik tərəflər arasında razılaşmanın yekun mərhələdə olduğunu bildirib. Müqavilə imzalanacağı təqdirdə “Eir Asiya”nın “Eirbas”dan 100 ədəd A321 və 34 ədəd A330 təyyarəsi alması nəzərdə tutulub.

“Eirbas”ın həmçinin Tayvanın “Star Lyuk Eyəlayns” şirkətiylə də müqavilə imzalaya biləcəyi deyilib. Tərəflər arasında imzalanacaq razılaşmanın 6 milyard dollar olacağı vurğulanıb.

Qeyd edək ki, 2015-ci ildə İranla nüvə razılaşmasının imzalanmasından sonra “Eirbas” şirkəti İranla genişmiqyaslı müqavilə imzalamağa cəhd göstərib. Trampın hakimiyyətə gəlməsindən sonra ABŞ-ın Tehrana qarşı yeni sanksiyalar tətbiq edəcəyini bəyan etməsi “Eirbas”ın planlarından geri çəkilməsinə səbəb olub.