Ötən gün fransız şairi, "İnternasional"ın müəllifi Ejen Potyenin ad günü idi.

O, 4 oktyabr 1816-cı ildə Parisdə dünyaya gəlib. Əmək fəaliyyətinə çox erkən yaşlarından başlayıb. İlk şeirləri 1830-cu il İyul inqilabı zamanı yazılıb. Elə həmin il "Gənc Muza" adlı nəğmələr toplusu nəşr olunub.

Gənc şairin ilk kitabı P.J.Beranje tərəfindən yüksək qiymətləndirilir. 1848-ci il inqilabı Potyenin yaradıcılığına çox böyük təsir göstərir.

Ancaq 1871-ci il Paris Kommunası onun həyat və yaradıcılığında xüsusi mərhələ təşkil edir. Potye Parisin alman qoşunlarından azad edilməsində bilavasitə iştirak edir, milli qvardiya üzvü olur. Bu dövrdə onda inqilabi-materialist yönlü ideyalar baş qaldırır. Kommunanın təşkilatçısı olan Ejen Potye barrikada döyüşlərində öz amalı uğrunda döyüşür. 1871-ci ildə Potye bütün inqilabın beynəlxalq himninə çevrilən "İnternasional"ı yaradır.

Kommuna darmadağın edildikdən sonra Böyük Britaniyaya, bir müddət sonra isə ABŞ-a köçür.

O, Amerikada üç poema yazır: "Fəhlə partiyası", "Paris Kommunası" və "Amerika fəhlələri – Fransa fəhlələrinə".

1880-ci ildə Potye axır ki, Fransaya qayıdır və Fəhlə partyasına daxil olur. 1884-cü ildə "Ağılsız kimdir?" və "Sosial-iqtisadi şeirlər və sosialist inqilabı nəğmələri", 1887-ci ildə isə "İnqilabi nəğmələr" şeirlər toplularını nəşr etdirir. Bu nəşrlərə ən yaxşı şeir və nəğmələr daxil edilib.

Ejen Potye 6 noyabr 1887-ci ildə vəfat edib.