ABŞ-ın Rusiya əleyhinə yeni sanksiyalar siyahısına Narkotiklər əleyhinə dövlət komitəsinin sədri, Narkotiklərin dövriyyəsinə nəzarət üzrə federal xidmətin (NNFX) direktoru Viktor İvanov da daxil edilib.

Axar.az RİA Novosti-yə istinadən bildirir ki, NNFX-nin başçısı Viktor İvanov dünən "TV-Sentr" telekanalının efirindən ABŞ-ın Narkotiklərin dövriyyəsinə nəzarət üzrə federal xidmətə qarşı sanksiyalarının heç bir praktiki mənası olmadığını bəyan edib.

"Amerikanın idarəmizə qarşı sanksiyalarının heç bir mənası yoxdur və Rusiya prezidentinə daha çox təzyiq göstərmək məqsədi güdür. Bundan başqa bizim həmkarlarımız – ABŞ narkopolisləri də belə tədbirlərin qəti əleyhinədirlər, ancaq onlarla heç kim hesablaşmır", - deyə İvanov bildirib.

İvanov onu da qeyd edib ki, sanksiyalara baxmayaraq, ABŞ-la əməkdaşlığı davam etdirməyə hazırdır. Onun sözlərinə görə, narkotiklərlə bağlı problem bütün ölkələr üçün eyni dərəcədə əhəmiyyətlidir.