Minalanmış üç avtomobil kürd özünümüdafiə döyüşçülərinin postu yaxınlığında, İraq sərhədlərindən 80 kilometrlik məsafədə Suriyanın Əl-Həsəkə şəhərindən şimalda partlayıb.

Axar.az RİA Novosti-yə istinadən bildirir ki, əsasən kürdlərin məskunlaşdığı Əl-Həsəkə şəhəri İŞİD terrorçularının nəzarəti altında olan Rakka və Deyr-əz-Zor əyalətlərinin qonşuluğunda yerləşir. Telekanalının məlumatına görə, münaqişə nəticəsində ən azı 30 kürd özünümüdafiəçisi həlak olub, onlarla insan yaralanıb.

Xatırladaq ki, ötən çərşənbə günü Suriyanın "Demokratik birlik" partiyasının lideri Salih Müslim Qərbə müraciət edərək, Əyn-əl-Ərəbin (Kobani) müdafiəsi üçün kürd döyüşçülətinə slah yardımı edilməsini xahiş etmişdi. Kürd lideri bildirmişdi ki, əgər vaxtında kömək gəlməsə, İŞİD-çilər şəhəri ələ keçirəcək, əhalini ucdantutma edam edəcəklər.

Son məlumata görə, İŞİD Kobaninin mərkəzini ələ keçirib.